ich han es neus portmone hüt a de uni becho, mitere unicharte drin. jetzt bini endlich student, mann isch das ä büäz gsi. und ebe, das ganze mitem neue portmone isch erstuunlich eifach gloffe.
ich meine s’alte portmone hät mich jetzt über jahre begleited und ich schätzes immerna sehr. villi erinnerige stecked i dem portmone, vill liquidität isch dur das teil dure direkt i mich gflosse. au wenn einigi vilicht glaubed es gsechi alt uus – das isch ja genau grad sin scharm -, es gaht um villmeh als nur um funktion. das teil hät style (de rhyme ghört mir luki). aber ja, es hät es sehr dicks läbe gfüärt und hät nie müäse hungere. vilicht häts amig dänkt: wua, ich mun für mis ässe überhaupt nüt mache. es ischem vilicht fasch chli z’eifach gfalle und es hetti vilicht gern meh useforderige gha.
da isch s’neue portmone ganz andersch. es isch zwar jetzt neu und flashy, aber das wirds auno verlüüre. im moment beiidruckts halt mit allerlei unbekanntem: 3 neui täschli zum charte verstaue, aneme faszinierende rot, eme total neue tragegfühl wo zwüsched komisch und euphorisch liit und es hät e studentecharte drin. aber wie gseit, es muss de alltagstescht bestah. es wird wohl nöd weniger liquid, aber hät sicher weniger gäld drin. s’gröschte gwicht wird wahrschinlich würkli das studichärtli sii. und genau uf das freuimi sehr. das mun s’alte portmone au verstah…
danke fürs läse alts portmone.